Бөгенбай батыр

ДерекнамаМақалаларСуреттер

(1680 -1778)

Бөгенбай батыр - Абылай хан тұсындағы батыр, атақты қолбасшы.

Қазақ жауынгерлері арасында зор беделге ие болған, сондықтан оны халық Қанжығалы Бөгенбай деп атап кеткен.

Сырдария өзенінің жағасында дүниеге келген.

Оның атасы – Әлдекүн, әкесі Ақша Қанжығалы руы ішінде белгілі адамдар болған.

Әз Тәуке хан оның әкесіне 80 мың сарбаздардан тұратын әскерге қолбасшы болуды сеніп тапсырған.

Ол сонымен қатар, өнерлі адам болған.

Ұсталық өнермен айналысып, соғыс қару-жарақтарын да жасаған. Бойында ақындық, айтыскерлік өнері болған.

Әкесінің өнері баласына дарыған.

Бала кезінен қазақ даласының шешендік өнерін бойына сіңіріп өскен ол жігіт шағында ауылдарға барып, ру арасындағы дауларды шешіп, билердің құрылтайларына қатысқан.

Өзіне жақын адамдардан отряд құрып, кейін елде «Қанжығалының қырық батыры» деп аталып кеткен.

Батырлығы мен қолбасшылық қабілеттілігі арқасында Бөгенбай үлкенге құрметке бөленіп, ерлігі ел аузында аңызға айналған

Бөгенбайдың қалмақтармен және қытай әскерлерімен болған қиян-кескі шайқастарда көрсеткен ерлігі сол кездегі жорық жырауларының толғауларында мәңгі өшпес өлең тілімен өрнектеліп қалды.

Өмірден көргені көп, қазақтың жүздері мен батырларын таныған, заңды және қазақ-жоңғарлар арасындағы қиындықты жақсы білетін Тәуке хан елді билеп тұрған кезінде, 1710 жылы Қарақұмда қазақ жүздерінің Төле, Қазыбек және Әйтеке билер қатысқан жиыны өтіп, билермен бірге халық жасағының өкілі ретінде Бөгенбай батыр да сайланған.

Бөгенбай батырға мұндай сенімділік танытуға оның бүкіл қазақ даласына тараған әскери қолбасшылық өнері мен 1710 жылғы Сары-Кеңгір өзені жағасында болған жоңғар ноянымен болған шайқастағы ерлігі себепші болады.

Съезде қаралған басты мәселе Жоңғар хандығымен арадағы қатынас болды.

Кейбіреулер руларды ғана емес жүздердің басын біріктіріп, жоңғарларға қарсы шығып, оларды қуып шығу керек десе, екінші біреулер Жоңғар хандығы жағына шығу керек дегенді айтты.

Көп пікірталастан кейінгі шешуші кез келгенде ортаға ашулы, қайсар Бөгенбай батыр шығады. Ақсақалдардың алдына шыққан ол семсерін аяғының астына тастап, көйлегін айырып, кеудесін ашып жіберіп: «Жауыздан есемізді қайтарамыз, тоналған жайлауымызды, тұтқындалған балаларымызды көріп қарап отыра алмаймыз, өлсек қолымызға қару алып өлеміз.

Қыпшақ даласының батырлары қай кезеңде бастарын төмен түсірген?

Мен қолымды жауымның қанына бояған кезде сақалыма әлі ақ түспеген еді!

Қазіргі келімсектердің зорлығына қалай шыдаймын.

Біз әлі жүйрік аттардан кенде емеспіз.

Әлі қорамсақта өткір ұшты садағымыз бар», – деді.

Бөгенбай батырдың бұл сөзі жоңғар мәселесін шешудің шегі болды.

Бұл сөзден кейін ешқайсысы ашық шығып сөйлей алмады.

Қазақ жасағының басшысы болып Бөгенбай сайланды.

Бөгенбай батырдың есімімен 1730 жылы көктемде Балқаш көлінің маңында қазақ пен қалмақтардың арасында болған шешуші Аңырақай шайқасы да тығыз байланысты.

Бөгенбай, Қабанбай, Шапырашты Наурызбай, Жәнібек, Малайсары сияқты атақты батырлар бастаған қазақ қолдары мен жасақтары қалмақ әскеріне екінші рет күйрете соққы берді.

Майдан даласында мыңдаған қалмақ әскерлері қаза тапты.

Көбі қырылып, жаралы болып, жаны шықпай жатқан жау әскерінің аңыраған даусы бірнеше күн даланы басына көтерді.

Бұл жер кейін «Аңырақай» деп аталып кеткен.

Аңырақайда аяусыз соққыға душар болған Шуно-Дабо басқарған қалмақ әскерлері Іле өзенінің бойымен шығысқа қарай қашуға мәжбүр болған.

Жеңісті баянды етіп, жауды өкшелей қуып, қазақ жерін азат ету жорығына жиналған үш жүздің әскер жасақтарының Шымкентке таяу Ордабасы деген жерде жиыны өтіп, онда қазақ әскерлерінің қолбасшысы болып, Әбілқайыр және Бөгенбай батыр сайланды.

Олардың басшылығымен қалмақ әскерлеріне үсті-үстіне соққы берілген.

Осындай шайқастардың бірінде Бөгенбай батырмен жекпе-жекте қалмақтың қолбасшысы Шуно-Добо қаза табады.

Бұл оқиға жау әскерлерінің рухын түсіріп жіберген екен.

1725-1727 жылдары Бөгенбай батыр Абылай ханмен бірге қазақ қолын басқарып, осы ұрыс нәтижесінде ойсырай жеңілген онсан қалмақ әскері Түркістан мен Саураннан Жоңғар Алатауының арғы жағына қуылған болатын.

Бөгенбай батыр қартайған шағына дейін ат үстінде жүрген.

1756-1758 жылдары Бөгенбай батыр Талқы түбінде Шығыс Түркістанға алғаш рет аяқ басқан қытай әскерімен қиян-кескі шайқасқа қатысты.

Бұл ұрыста ол қытайларды қыра талқандап, Үрімшіге дейін қуып барды.

Бөгенбай батырдың ең ірі жорықтарының бірі 1750 жылы Аягөз өңірінде жеңіліске ұшырады. Осыдан кейін екі жақ мәмілеге келіп, достық келісім жасады.

Бөгенбай батыр дана және аса зерделі адам болған.

Ол 1761 жылы елшілік мақсатпен Қытайға барғанда Абылай ханның ұлы Әділді қоса алып барады.

Батыр Торғай өзенінің жағасында қаза болған.

Бұрында бұл жер «Бөгенбай сөресі» деп аталған, қазір «Шахта» деп аталады.

Денесін қырық күн бальзамдағаннан кейін 45 күнде Ежелгі екінші Мекке саналған Түркістандағы Қожа Ахмет Йассауи – Әзірет Сұлтан кесенесіне ақ түйемен алып барып жерлеген.

Дереккөз:

М. Солтанғазина, Б. Шәкиев, Ф. Лекерова.

Тарихи тұлғалар. Алматы “ Алматыкітап “ 2009 ж . 325 б.

Content 2
Content 3

Пікір білдіру

Security code
Жаңарту