Айтаханов Қуаныш Айтаханұлы 1947 жылы 14 қарашада Онтүстік Қазақстан облысы, Отырар ауданы, Отырар ауыл әкімшілігі аумағында туылған.

Жамбыл зоотехникалық-малдәрігерлік техникумын, Скрябин атындағы Еңбек Қызыл Ту орденді Мәскеу Малдәрігерлік Академиясын, Алматы жоғарғы партия мектебін үздік бітірген.

Еңбек жолын 1965 жылы Оңтүстік Қазақстан облысы Шәуілдір ауылында веттехник болып бастады. 1970-1973 жылдары қазіргі Бәйдібек (Алғабас) ауданының XXII партсъезд атындағы кеңшардың бас мал дәрігері қызметін атқарды. 1973-2005 жылдар аралығында облыстық партия комитетінің нұсқаушысы, облыстық комсомол комитетінің екінші хатшысы, қазіргі Қазығұрт (бұрынғы Ленин) аудандық партия комитетінің екінші хатшысы, Шардара, Қазығұрт аудандық кеңестері атқару комитетінің төрағасы, облыстық агроөнеркәсіп комитеті төрағасының бірінші орынбасары, Арыс қалалық партия комитетінің бipiнші хатшысы, қалалық Кеңестің төрағасы, Әкімі, Оңтүстік Қазақстан облысы әкімінің орынбасары, Созақ, Сайрам, Отырар аудандарының әкімі қызметтерін атқарды. 1973 жылдан 1991 жылдар аралығында Оңтүстік Қазақстан облыстық Кеңесінің депутаты, Шардара, Қазығұрт, Арыс аудандық Кеңестерінің депутаты болып сайланды.

1990 жылы Қазақстан Республикасы Жоғарғы Кеңесінің он екінші шақырылымының депутаты болып сайланды. Экономика ғылымдарының докторы, Қазақ ауыл шаруашылығы ғылымдары Академиясының академигі (толық мүшесі).

2005 жылдан Қазақстан Республикасы Парламенті Сенатының депутаты.

Қ.Айтаханов бірнеше кітаптардың авторы, 2010 жылы Сенат депутаты қызметіндегі еңбегі нәтижелерінің көрсеткіші іспетті «Ел мерейі жолында» атты көлемді кітабы жарық көрді, «Государственное регулирование развития селького хозяйства» атты оқу-әдістемелік кітабы жоғарғы оқу орындарының оқу процесінде пайдаланылады.

Қуаныш Айтаханұлы Қазақстан Республикасы Парламенті Сенатының Аграрлық мәселелер және қоршаған ортаны қорғау комитетінің хатшысы, Сенаттың «Өңір» депутаттық тобы жетекшісінің орынбасары, «Нұр Отан» ХДП жанындағы Жемқорлықпен күрес жөніндегі республикалық қоғамдық кеңестің мүшесі.

 Тәуелсіз Мемлекеттер Достастығы елдерінің Парламентаралық Ассамблеясының Экономика және қаржы жөніндегі тұрақты комиссиясының,  Австрия Республикасы, Ұлыбритания және Солтүстік Ирландия Құрама Корольдігі, Иран Ислам Республикасы, Испания Корольдігі, Француз Республикасы мемлекеттерімен ынтымақтастық тобының мүшесі.

Елге сіңірген еңбегі «Парасат», «Құрмет», «Құрмет белгіci» ордендерімен, «Тың және тыңайған жерлерді игергені үшін», «Астана», «Қазақстан Республикасының 10 жылдығы», «Қазақстан Республикасының Конституциясына 10 жыл», «Қазақстан Республикасының Парламентінің 10 жылдығы», «Астанаға 10 жыл» медальдарымен атап өтілген. Қазақстан Республикасы Президентінің Алғыс хатымен, Парламент Сенатының және Тәуелсіз Мемлекеттер Достастығы елдерінің Парламентаралық Ассамблеясының Құрмет грамоталарымен марапатталған.

Қуаныш Айтаханұлы жұбайы Айман Мағзиқызы екеуі үш ұл-қыз және бірнеше немерелер тәрбиелеп отырған үлгілі отбасы.

Ол, Арыс, Бәйдібек, Қазығұрт, Отырар, Сайрам, Созақ, Шардара аудандарының Кұрметті азаматы.

Қуаныш Айтаханұлы Айтаханов өзіне де өзгеге де принциптік талап қоя білетін, алдына үлкен мақсаттар қойып, Тәуелсіз Қазақстанның гүлденуі мен өркендеуіне өз үлесін қосып келе жатқан білікті де білімді азамат.