Раимов Сағатбек Раимұлы

ДерекнамаМақалаларСуреттер

Раимов Сағатбек Раимұлы 1945 жылдың 29 қазанында Алматы облысы, Қаскелең қаласында өмірге келді.

Алғашқы еңбек жолын 1962 жылы ҚазМИС тәжірибелік шаруашылығында қарапайым жұмысшыдан бастады. 1963 жылы Алматы Халық шаруашылығы институтына (АХШИ) оқуға түседі. 1964-1967 жылдар арасында Кеңес Армиясы қатарында қызмет етеді. АХШИ-ді 1970 жылы бітіріп, Сағатбек Раимұлы Жоғары оқу жүйесінде қызмет етеді. Оқытушылық қызметін С.Р.Раимов Алматы Халық шаруашылығы институтынан бастады. Осы жерде 22 жыл қызмет жасап, ассистенттен факультет деканына дейін көтеріледі. 1979 жылы кандидаттық диссертациясын сәтті қорғады.

Осы институт аясында (1970-1991 ж.ж.) қызмет істеген жылдары Раимов С.Р. республиканың халық шаруашылығына жоғары білікті мамандар дайындауға елеулі үлес қосты. Ол Қазақстан Республикасында қабылданған жаңа экономикалық мамандықтар номенклатурасын, оқу жоспарлары мен бағдарламаларын шығарушылардың бірі болды. Сағатбек Раимовтың шәкірттері мен оқушылары бүгінгі күні мемлекеттік аппараттың, министрліктер мен ведомстволардың, компаниялар мен фирмалардың барлық салаларында табысты еңбек етуде. Олар өздерінің ұстазына алғыстарын білдіреді.

1991-1997 жылдар аралығында ол Қазақстан Республикасы Президенті аппараты мен министрлер кабинетінің жауапты орындарында қызметтер атқарды. Кеңесші, сектор меңгерушісі, ҚР Үкіметі аппаратының мемлекеттік қызмет реформасы бойынша бөлім меңгерушісі, ҚР мемлекеттік қызмет реформасы бойынша секретариат меңгерушісі қызметтерін атқарды.

ҚР Жоғарғы білім туралы заңын дайындауға қатысып, Жоғарғы білімді реформалауға өлшеусіз үлес қосты.

Сағатбек Раимұлы ҚР мемлекеттік қызмет стратегиясын жасауда орасан зор жұмыстар жүргізді, Мемлекеттік қызмет туралы заңды қабылдауға қатысты. ҚР аумағын реформалаудың авторларының бірі болды. Адал еңбегі үшін ҚР Үкіметінің грамоталары мен алғыс хаттарына ие болды. 1997-1999 жылдары ҚР Статистика жөніндегі агенттіктің (СА) кадрларының біліктілігін көтеру және статистикалық зерттеулер институтының директоры қызметін атқара жүріп, Ұлтстатагенттіктің жетекші қызметкерлері мен кадрларын қайта даярлау және біліктілігін көтеруді ұйымдастыруға үлес қосты. ҚР СА-мен тығыз жұмыс істей отырып, Сағатбек Раимұлы статистикалық қызметті реформалауға және оны халықаралық стандартқа сәйкестендіруге белсенді араласты.

2005 жылы ерекше еңбегі үшін «Қазақстан Статистикасына 85 жыл» медалімен марапатталды.

1999 жылы ҚР Үкіметінің шешімімен қайта ұйымдастырылған Алматы экономика және статистика институтының ректоры болып тағайындалды.

Институт 2002 жылы Алматы экономика және статистика академиясы (АЭСА) болып қайта құрылды. Іскер де тәжірибелі ұйымдастырушы ретінде ол АЭСА-ның бас және аймақтық институттарына да тиімді басшылық жүргізе алды.

Оның оқу процесін халықаралық стандартқа сәйкес ұйымдастыруды жаңаша тәсілдермен жасау мен енгізуге қосқан үлесі зор. Сағатбек Раимұлы жыл сайын жаңа мамандықтарды аша отырып, оқу процесіне жаңа ақпараттық – коммуникациялық технология енгізді, дистанциялық (қашықтан) оқыту түрін кіргізді. Ұстаздар қауымын ғылым докторлары және кандидаттарымен толықтырып, материалдық-техникалық базаны күшейтті. Бүгінгі таңда АЭСА-да 17 мыңнан астам студент дәріс алады.

С.Р.Раимовтың басшылығымен АЭСА өз оқу бағдарламаларын жоғарғы оқу орындарының ішінде алғашқы болып халықаралық аккредитациядан өткізді.

АЭСА-ның халықаралық байланыстарын нығайтуда С.Раимұлының еңбегі өте зор. МЭСИ және Малайзия Мультимедия университетімен бірге кадрларды дистанциялық оқыту жөнінде біріккен жобалар жүзеге асырылуда. АЭСА –Канаданың (Торонто қаласы) Халықаралық бизнес мектебінің ресми өкілі. Академия Еуроодақ пен Еуростат бағдарламаларын іске асырушы болып табылады. АЭСА іскерлік тәжірибедегі нәтижелерінің жетістіктері үшін 2005 жылы Швейцарияда (Женева қаласы) Халықаралық қордың Алтын медаліне ие болды.

С.Р.Раимовтың осы жетістері мен беделі ғылыми-педагогикалық қоғамдастық арасында АЭСА-ны Қазақстанның күрделі оқу орындарының қатарына енгізуге мүмкіндік берді.

С.Р.Раимов ғалым ретінде тек Қазақстанда ғана емес, ТМД, шет елдерге де белгілі. Ол экономика, есеп және аудит салаларында ғалымдар мен ғылыми-педагогикалық кадрларды дайындады.

Оның жетекшілігімен 5 ғылыми кандидаттық диссертация қорғалды. Ғылыми зерттеулерінің негізінде ол 3 монография, 21 оқулық пен оқу құралдарын шығарып, 70-ке тарта ғылыми мақалалар жариялады. Оның бухгалтерлік есеп пен аудит саласындағы ғылыми еңбектері ғылыми ортада кеңінен танылған. Ғылыми еңбектері шет елдерде де белгілі. Ғалым ретінде ол 50-ден астам халықаралық, республикааралық және республикалық форумдар мен ғылыми конференцияларға қатысты.

С.Р.Раимов еліміздің қоғамдық өміріне де белсене араласады.

ҚР «Көгалдағы хоккей» федерациясының президенті, ҚР «Айкидо» қоғамдастығының президенті, ҚР жоғары лигадағы «Оқжетпес» баскетбол командасының құрметті президенті.

Өзінің еңбек сүйгіштігі, ұйымдастырушылық қабілеті, шығармашылық, іскерлігі, білімділігі және адамдармен сыйласа жұмыс жасай білуі арқасында алдына қойған мақсаттарына қол жеткізді. Егеменді елімізге жоғарғы білікті маман дайындауда үлкен жетістіктерге жетуде.

Бұл күндері белгілі ғалым, қоғамның белсенді қайраткері, профессор, Сағатбек Раимұлы, Алматы Экономика және статистика академиясының Президентінің кеңесшісі болып қызмет атқарып келеді.

Content 2
sr-285x225
sr1-285x329

Пікір білдіру

Security code
Жаңарту