Жыр -  арнау Қайраткер (Асылы Османға)

Жыр -  арнау

Қайраткер
(Асылы Османға)

Күн кешсе тоңмойындар тоқ секілді,
Ой-хой, дүние-ай, уайым-мұң жоқ секілді...
Қыран көзді бір Апа
«Қазағым!» деп,
Жарқылдар түнді тілген от сияқты!

Қазақ үшін
Қазақтың тілі үшін –
Ұстараның жүзінде ғұмыры – шың!
Әзірбайжан аруы алысады,
Елдіктің ерен биік тұғыры үшін!

Тіл үшін басын тіккен, қайнап кеуде,
Ұқсатамын Апамды айбатты ерге.
Отан үшін, ел үшін, қоғам үшін
Күресе білген кемел қайраткерге!

Бас ием,
Имейтұғын алтын басты,
(Дей алман өзге жұрттан даңқым асты).
Ана  тілдің жалауын желбіретіп,
Шырылдаған қарай гөр қарлығашты!

Қастерлеп қазағымның тіл-жәннатын,
Кестелі ойман жаһанға тіл қататын.
Аруағыңнан айналдым, Асылы апа,
Түбі Осман, Көктүріктен тін тартатын!


Ғалым Әріп
Ақтау қ.

Дереккөз: Ана тілі газеті
№ 24 (1017)
24-30 маусым 2010 ж.






Асылы апаға

Білімнің айдынында жүзген Апа,
Туған жер, кең даланы сүйген Апа.
Халқымен сырласады, ой тербейді
Сақшыдай тіл қорғаған батыр Апа.

Сыңқылдап сөз сөйлесе Сарайларда,
Сүйсініп тыңдайды елім арайлана.
Қадірін ана тілдің сонда сезем,
Оятқан ой-сананы талайларда.

Сусындап, туған тілмен еңбек етіп,
Біліммен болашаққа баптанамыз.
Тілімнен сөз маржанын тізілтетін,
Біз Сізбан мақтанамыз, Асыл Апа.

Құрметпен Мәруар Қайыржанқызы
5 «А» сынып жетекшісі
№ 149 орта мектебі
Әуезов ауданы
17.09.02



Жақсының ізгі ісі
Асылы Осман ханымға

Асылы апа, аяулы менің асылым,
өзіңмен өрге өрлер тілімнің тасы мың.
Үлгісің сен, өнегесің өзгеге,
Жүргендерге тілінен мақұрым ұлтының.

Ұлтымды сүйсең, ұлтым сені сыйласын,
Лайықсың сен біздегі барлық сыйға шын.
Сен сөйле тынбай, анасын еміп, тілінде
Сөйлемей жүрген ессіздер есін жинасын.

Халық қой қадірін білер кісінің,
Жадынан шықпас жайдары мынау пішінің.
Көміліп әркез көрінбей қалып көрген жоқ
Халыққа еткен жақсының ізгі ісінің.

Әбдібек Әбдіманапұлы

Тіл жанашыры, ғалым Асылы Османға!

Кеңестік кезден «Ел» дедің,
Достыққа ғұмыр арнады.
Татсаң да өмір кермегін,
«Қазақ тілі!» деп ағладың.

Сыпырмай «қайыс ноқтасын»,
Қазақ боп жүр-ау әлсіз кей.
... Туған жер дәмін ақтасын,
Басқа ұлттың бәрі дәл сіздей!...