Сайлау құқығының өзекті мәселелері сараланды

Дінмұхаммед Қонаев атындағы университетте “Қазақстан Республикасындағы сайлау құқығы: қазіргі жағдай, өзекті мәселелер мен болашағы” деген тақырыпта халықаралық ғылыми-тәжірибелік конференция өтті.
Оған ТМД-ға танымал заңгерлер, саяси партиялар, қоғамдық ұйымдар мен бірлестіктердің жетекшілері, ғылыми орталықтардың өкілдері қатысты.
Жиынды «Заңгерлер әділ сайлау үшін» республикалық бірлестігі ұйымдастырды.

Конференцияның ашылуында «Заңгерлер әділ сайлау үшін» республикалық бірлестігінің төрағасы, заң ғылымдарының докторы, профессор Өмірәлі Қопабаев, БҰҰ-ның Қазақстандағы тұрақты өкілі Хаолянь Шу, Қазақстан Республикасы Конституциялық Кеңесінің төрағасы, заң ғылымдарының докторы, профессор Игорь Рогов, ҚР Орталық сайлау комиссиясының мүшесі,заң ғылымдарының докторы, профессор Марат Сәрсембаев кіріспе сөз сөйледі.
Алқалы жиынның мақсаты - Елбасының бастамасымен сайлау құқығына өзгерістер мен толықтырулар енгізілуіне орай қазақстандық сайлау құқығының дамуы мен оны жетілдірудегі өзекті мәселелерді талқылап, конференция қорытындысы бойынша мемлекеттік органдарға ұсыныстар жолдау болғандықтан пленарлық мәжілісте баяндамалар жасаған заң ғылымдарының білгірлері ғылыми тұжырымдары мен өзекті ойларын ортаға салды. Мәселен, Мемлекет және құқық институтының директоры, заң ғылымдарының докторы, профессор Ғайрат Сапарғалиевтің жасаған баяндамасына Қазақстан Республикасының сайлау заңдарын жетілдіру өзек болса, профессор Өмірәлі Қопабаевтың баяндамасында еліміздің сайлау құқығын жетілдіру мәселелері кеңінен қамтылды. Ал, профессор Марат Сәрсембаев өз баяндамасында Қазақстанның сайлау заңдары мен Еуроодақ елдерінің электоральды тәжірибесін салыстыра келе, Қазақстанның сайлау құқығына енгізілген өзгерістер мен толықтырулардың халықаралық стандарттарға сәйкес келетіндігін атап көрсетті.
Жиынға қатысушылардың бірі Қырғызстан мемлекеттік заң академиясының ректоры, заң ғылымдарының докторы, пофессор Қанат Керезбеков Қазақстанның сайлау құқығында қалыптасқан оң тәжірибелердің үстіміздегі жылдың шілде айында өткізілетін Қырғызстанның Президенттік сайлауында қолдануға болатындығына тоқталды. Демек, бұл Қазақстан тәжірибесінің халықаралық стандарттарға сәйкестігінің жарқын көрінісі. Пленарлық мәжілісте жасалған жиырмаға жуық ғылыми баяндамалардың қай-қайсысы да өзекті мәселелерді терең саралауларымен құнды болды. Мәселен, «Әділет» демократиялық партиясы төрағасының орынбасары Т.Сыдықов Қазақстан Республикасының алдағы жылы ЕҚЫҰ төрағалық ететіндігінің алдында сайлау құқығын барынша жетілдіруі атап айтарлық жетістік екендігін баса айтты. Өзінің ежелгі мемлекетінің үстіне бүгінде дүниежүзі кең таныған Қазақстан Республикасын құрған көк байрақты елдің бұған дейін де мемлекет басқару мен заң шығару тәжірибесі болғандығы белгілі. Бұл тақырып Қазақстан Республикасы Заң ғылымдары академиясының президенті, заң ғылымының докторы, профессор Сәкен Өзбекұлының «Көшпенді қазақ өркениеті» деген тақырыпта жасаған баяндамасында кеңінен қамтылды.

Бейбіт ЖҰМАЖАН,
Алматы

Дереккөз: ЕЛ - Ұлттық қоғамдық-саяси, экономикалық апталық
26.05.2009