Лидия Кәденова: Еңбекқор адам кез келген мақсатқа жете алады

ҚР еңбек сіңірген әртісі, «Құрмет» орденінің иегері, Лидия Кәденовамен кездесіп, сұхбаттасудың сәті түскен еді.
– Сізді көбінесе жұрт «Тамаша» ойын-сауық отауы арқылы таниды. Дегенмен, әзіл-ысқақ отаулары арқылы көреремен көз айымына айналып, танымал болғаныңызбен өнер жолыңызды театрдан бастадыңыз ғой. «Тамашаға» қарағанда, театрдағы еңбек өтіліңіз де біршама көп сияқты…
– Дұрыс айтасың. Киелі театр сахнасында жүргеніме тура 35 жыл болды. Халыққа белгілі Әмина Өмірзақова, Байділда Қалтаев және т.б. өнер иелерімен қызметтес болдым. Театрдан үйренгенім көп. Өзім басты рөлдерді сомдаған – «Өзімді іздеп жүрмін», «Ең әдемі келіншек», «Чайка» сынды қойылымдар жүрегіме ерекше ыстық. Қазір де үлкен ұжымда жұмыс істеп жүрмін. Соған қуаныштымын.
Шыны керек, көрермен халық мені «Тамашадан» білді. Бұл ұжымға келгеніме 15 жыл болыпты. Телевизияның құдіреті – сені 2-3 минутта көрермендерге белгілі етеді екен. Сонысымен де – ерекше. «Тамашаның» жетекшісі, белгілі өнертанушы Лұқпан Есенов ағамыз өмірден өткенде біздер ұжыммен қатты қайғырдық. Ол кісінің шынымен де «Тамашаға» сіңірген еңбегі - орасан.
– Лидия Тәжединқызы, театр демекші, көптеген өнер ұжымдары 1990 жылдары тоқыраушылықты бастан кешірді. Қиыншылықтар кезікті, әртістердің айлығы мардымсыз болды дегендей. Бүгінде өзіңіз өнер көрсетіп жүрген Ғ.Мүсірепов атындағы қазақ мемлекеттік академиялық балалар мен жасөспірімдер театрының жағдайы қалай?
– Жасыратыны жоқ, сол жылдары бүкіл өнер ұжымдары қиыншылық көрді ғой. Бірақ, Талғат Теменов деген азамат театрдың басшылығын қолына алып, жұмысқа белсене араласқан соң, жағдайымыз да біршама жақсарды. Әртістердің де айлықтары көтерілді. Не десеңіз де бүгінгі театр қызметкерлерінің көңілі көтеріңкі. Аса көп қиыншылықтар жоқ деп есептеймін. Ал жастар жөнінде айтар болсам, талантты жас мамандар көптеп келуде. Мәселен, Айгүл Иманбаева, Жанар Мақашева және т.с.с. өнерпаздарды атауыма болады. Көптеген қойылымдарда басты рөлді сомдап жүрген Жанар Мақашева қызымыздың бет алысы жаман емес. Өткен жылдары «Жылдың ең үздік әртісі» атағын иеленіп, басшылықтың қолынан бір бөлмелі пәтердің кілтін алды. Жалпы, жастардың өнерге деген қызығушылығы жоғары. Еңбекқор адам кез келген мақсатқа жете алады. Бәрі де - өз қолыңда.
– Жақында театр басшысы Талғат Теменовтен ұжым әртістерінің әндері жазылған күйтабақ жарық көреді деп естіп едік. Әнжинақта сіздің де шығармаларыңыз бар шығар…
– Жуырда Ғ.Мүсірепов атындағы қазақ мемлекеттік академиялық балалар мен жасөспірімдер театрының жанынан театрда өнер көрсетіп жүрген әртістердің әндері жазылған күйтабағымыз жарық көрмек. Таспаға тек қана әндер жазылып, халыққа таратылатын болады. Менің де орындап жүрген «Жүрегім менің» және «Қуанышым» атты екі әнім сазды табаққа енгізілмекші.
– Сұхбат соңында отбасыңыз туралы айта кетсеңіз…
– Дидар есімді ұлым - Жүсіпбек Елебеков атындағы эстрада-цирк колледжінің студенті. Амандық болса, менің жолымды қумақшы. Ал жолдасым да осы өнер саласында.
– Уақыт бөліп, сұхбаттасқаныңызға рахмет. Шығармашылық табыс тілеймін.

Сұхбаттасқан
Айбек ТАСҚАЛИЕВ

Дереккөз: ЕЛ - Ұлттық қоғамдық-саяси, экономикалық апталық
6.04.2010